Kungiyar USAID ta tallafa wa Najeriya da na’urorin yin gwajin cutar tarin fuka mai suna ‘GeneXpert Ultra’ 86,500 domin inganta yaki da cutar a kasar nan.
Na’urar na da ingancin gano kwayoyin cutar a jikin mutum sama da 10,000.
Baya ga haka na’urorar mai suna ‘GeneXpert Ultra’ zai taimaka wajen gano mutanen da cutar baya jin magani a jikin su sannan da gano cutar a jikin mutanen dake fama da cutar kanjamau.
Idan ba a manta ba a watan Janairu, uwargidan gwamnan jihar Legas Ibijoke Sanwo-Olu ta kaddamar da sabbin motoci guda uku na tafi da gidanka da za a rika yi wa mutane gwajin cutar tarin fuka a ko-ina suka a fadin jihar.
Ibijoke ta bayyana cewa motocin za su rika yawo a jihar suna yi wa mutane gwajin cutar nan take da kuma basu magani kyauta.
Bayan haka Ibijoke ta ce gwamnatin jihar ta zuba na’urorin gwajin cutar a wasu zababbun asibitoci 18 dake jihar domin su rika yi wa mutane gwajin cutar da basu magani kyauta.
Bincike ya nuna cewa a shekarar 2019 akwai mutum 38,277 dake fama da cutar ba tare da sanin gwamnati ba a jihar.
Sannan duk shekara cutar na kashe 245,000 kuma wasu 590,000 na kamuwa da cutar a Najeriya.
Idan ba a manta ba asusun bada tallafi na duniya wato Global fund, ya baiwa Najeriya zunzurutun kudi har dala miliyan 500 tare da wasu kasashen Afrika 10 domin yaki da tarin fuka a cikin shekara uku masu zuwa.
Asusun zai kashe dala biliyan 12.7 a kasashe masu tasowa domin yaki da cututtukan kanjamau, tarin fuka da zazzabin cizon sauro.
Source link
